Тоҷикистону Қирғизистон ҷузъиёти музокироти ҳайатҳои ҳукуматӣ оид ба делимитатсия ва демаркатсияи сарҳади давлатиро, ки рӯзҳои 1-2 майи имсол баргузор гардид, нашр карданд.
Тибқи изҳороти ҷонибҳо, роҳбарони ҳайатҳо, аз ҷумла, ба мувофиқа расидаанд, ки то ба итмом расидани раванди делимитатсия, демаркатсия ва барасмиятдарории қонунии Сарҳади давлатии Тоҷикистону Қирғизистон, бо мақсади ҳаракати бемамонияти шаҳрвандон, убури воситаҳои нақлиёт ва молҳои Тоҷикистон, роҳи мошингарди “Хоҷаи Аъло-Ворух”-ро дар хамгашти самти шарқии нуқтаи аҳолинишини Танги (Капчыгай) якҷоя месозанд ва ҷониби Тоҷикистон истифода ва нигоҳдорӣ мекунад. Таъкид шудааст, ки мақоми ин роҳро созишномаи алоҳидаи давлатӣ байни ду кишвар муайян мекунад.
Ҳайати Тоҷикистонро дар ин музокирот Раиси Кумитаи давлатии амнияти миллӣ Саймумин Ятимов ва ҳайати Қирғизистонро роҳбари Кумитаи давлатии амнияти миллӣ Қамчибек Ташиев роҳбарӣ карданд.
ИЗҲОРОТИ МУШТАРАКИ
Ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон дар бораи делимитатсия ва демаркатсияи сарҳади давлатии Тоҷикистону Қирғизистон
01-02 майи соли 2021 дар шаҳри Ботканди вилояти Ботканди Ҷумҳурии Қирғизистон ҷаласаи навбатии якҷояи Ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон оид ба делимитатсия ва демаркатсияи сарҳади давлатии Тоҷикистону Қирғизистон баргузор гардид. Дар рӯҳияи эътимоди тарафайн ва ҳамсоягии нек, бо истинод ба таърихи қадимаи ҳамзистии осоиштаи ду халқи бародар, оид ба қабули чораҳои фаврӣ, ки ба ҳалли вазъ дар сарҳади Тоҷикистону Қирғизистон равона шудаанд, эҳё ва фаъолсозии кори Комиссияи муштарак, мубодилаи ҳамаҷонибаи афкор сурат гирифт.
Роҳбарони ҳайатҳои Ҷумҳурии Тоҷикистон ва Ҷумҳурии Қирғизистон дар бораи зарурати тасвири ҳарчи зудтари хати сарҳади давлатии Тоҷикистону Қирғизистон дар қисматҳои боқимонда пурра изҳори ҳамдигарфаҳмӣ карданд.
Ҷонибҳо ба мувофиқа расиданд, ки барои тасвири хати лоиҳавии Сарҳади давлатӣ байни Ҷумҳурии Тоҷикистон ва Ҷумҳурии Қирғизистон дар қисматҳои аз нуқтаи сарҳадии №43 то нуқтаи сарҳадии №61 ва аз нуқтаи сарҳадии №135 то нуқтаи сарҳадии №141 аз ҳуҷҷатҳо ва маводи марзбандии миллию ҳудудии солҳои 1924-1927 ва комиссияи паритетии соли 1989 истифода мекунанд.
Ба гурӯҳҳои кории топографӣ дастур дода шуд, ки хати лоиҳавии Сарҳади давлатии Тоҷикистону Қирғизистонро дар қисматҳои дар боло зикршуда аз 5 то 9 майи соли 2021 тасвир кунанд.
Ҳамзамон бо ин, дар минтақаҳои Овчи Қалъачаи ноҳияи Бобоҷон Fафуров, Чоркӯҳ, Сомониён, Хоҷаи Аълои шаҳри Исфараи вилояти Суғди Ҷумҳурии Тоҷикистон, инчунин нуқтаҳои аҳолинишини Максат, Кулундуи Лайлак, Коктерек, Оқсойи ноҳияҳои Бодканди Ҷумҳурии Қирғизистон, гурӯҳҳои кории Тарафҳо то 17 майи соли 2021 ба иҷрои корҳои топографӣ ва тасвири хатти лоиҳавии сарҳади давлатии Тоҷикистону Қирғизистон дар қисматҳои болозикр шурӯъ мекунанд.
Ба мувофиқа расида шуд, ки то ба итмом расидани раванди делимитатсия, демаркатсия ва барасмиятдарории қонунии Сарҳади давлатии Тоҷикистону Қирғизистон, бо мақсади ҳаракати бемамонияти шаҳрвандон, убури воситаҳои нақлиёт ва молҳои Ҷумҳурии Тоҷикистон, ҷонибҳо роҳи мошингарди “Хоҷаи Аъло-Ворух”-ро дар хамгашти самти шарқии нуқтаи аҳолинишини Танги (Капчыгай) якҷоя месозанд ва ҷониби Тоҷикистон истифода ва нигоҳдорӣ мекунад. Мақоми ин роҳро созишномаи алоҳидаи давлатӣ байни ду кишвар муайян мекунад.
Барои ҳарчи зудтар оғоз намудани сохтмони ин роҳ, ба гурӯҳҳои кории топографӣ супориш дода шуд, ки якҷоя бо ташкилотҳои лоиҳакашӣ тадқиқоти саҳроии ин мавзеъро дар заминҳои истифодаи амалии минтақаи Ботканд то 1 июни соли 2021 анҷом диҳанд.
Ҷонибҳо ба мувофиқа расиданд, ки пас аз ба итмом расидани сохтмони роҳи мошингарди “Хоҷаи Аъло-Ворух” дар хамгашти шарқии нуқтаи аҳолинишини Танги (Капчыгай) ба тасвири лоиҳавии хати сарҳади давлатии Тоҷикистону Қирғизистон шуруъ мекунанд.
Ҷонибҳо ба мувофиқа расиданд, ки Ҷаласаи муштараки навбатӣ дар қаламрави Ҷумҳурии Тоҷикистон баргузор карда мешавад.
Аз ҳайати
Ҷумҳурии Тоҷикистон
Ятимов С.С.
Аз ҳайати
Ҷумҳурии Қирғизистон
Ташиев К.К.
