Қурбонбӣ Раҳмонова, хоҳари Президенти Тоҷикистон Эмомалӣ Раҳмон, шоми 20-уми июл дар синни 64-солагӣ даргузашт.
Хадамоти матбуоти Сарвари давлат бо нашри як таъзиянома ин маълумотро тасдиқ кард:
“Ҳукумати Ҷумҳурии Тоҷикистон дар ин лаҳзаҳои ниҳоят вазнин ба бародари марҳум — Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, фарзандон, хешу табор ва наздикону пайвандонашон изҳори ҳамдардии амиқ баён мекунад”, — омадааст дар таъзияномаи Ҳукумати Тоҷикистон.
Бино ба хабарҳо, Қурбонбӣ Раҳмонова чанд рӯзи ахир дар беморхонаи клиникии шаҳрии № 5, мавсум ба “Медгородок” табобат мегирифт.
Маросими намози ҷанозаи марҳум, имрӯз дар Данғара баргузор мешавад.
Зимнан, 5-уми июл Ӯзбекбӣ Асадуллоева, хушдомани Президенти Тоҷикистон, дар синни 88-солагӣ аз бемории монанд ба коронавирус даргузашта буд.
Ҳайати кормандони “ИмрӯзNews” аз даргузашти Қурбонбӣ Раҳмонова андӯҳгин буда, ба хонаводаи Сарвари давлат сабру шикебоӣ хоҳон аст.
