Вазорати корҳои хориҷии Эрон Иёлоти Муттаҳидаи Амрикоро масъули мустақими нақзи режими оташбас нисбат ба Эрон ва Лубнон донист. Дар изҳороти расмии ин ниҳод гуфта шудааст, ки Вашингтон бояд пайомадҳои чунин вазъиятро бар дӯш гирад:
“Масъулияти мустақими ИМА ҳам барои нақзи оташбас алайҳи Эрон ва ҳам барои нақзи оташбас аз ҷониби Исроил дар Лубнон ошкор аст. Масъулияти тамоми оқибатҳои ин вазъият бар дӯши Амрико қарор дорад”, – омадааст дар баёнияи Вазорати корҳои хориҷии Эрон.
Мақомоти эронӣ бори дигар таъкид кардаанд, ки аз нигоҳи Теҳрон, нақзи оташбас дар як ҷабҳа ба маънои нақзи оташбас дар тамоми ҷабҳаҳо мебошад.
Дар ҳамин ҳол, Вазорати корҳои хориҷии Эрон изҳор доштааст, ки кишвар ҳақ дорад барои ҳимояи манфиатҳои миллӣ ва амнияти худ аз тамоми имконот ва иқтидорҳои мавҷуда истифода кунад.
Қаблан хабаргузории Tasnim иттилоъ дода буд, ки Эрон дар эътироз ба ҳамлаҳои Исроил дар Лубнон табодули паёмҳо ва тамосҳои ғайримустақим бо ИМА-ро қатъ кард.
Танишҳо дар минтақа дар ҳоле шиддат мегиранд, ки масъалаи риояи оташбас ва идомаи музокироти дипломатӣ байни ҷонибҳо ҳамоно яке аз мавзӯъҳои асосии рӯзномаи сиёсати байналмилалӣ боқӣ мемонад.
