Дар ҷаласаи Шӯрои Маҷлиси Миллии Маҷлиси Олии Ҷумҳурии Тоҷикистон даъвати шашум, ки рӯзи 25 июн таҳти раёсати Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ баргузор гардид, 33 масъала баррасӣ шудааст.
Бино ба маълумоти котиботи палатаи болоии парламенти Тоҷикистон, аъзои Шӯрои Маҷлиси Миллӣ, аз ҷумла, 1 қонуни мукаммал — Қонуни Ҷумҳурии Тоҷикистон “Дар бораи ёрии ҳуқуқӣ” ва қонунҳои Ҷумҳурии Тоҷикистон “Дар бораи ворид намудани иловаҳо ба Кодекси мурофиаи ҳуқуқвайронкунии маъмурии Ҷумҳурии Тоҷикистон”, “Дар бораи ворид намудани иловаҳо ба Кодекси мурофиавии ҷиноятии Ҷумҳурии Тоҷикистон”, “Дар бораи ворид намудани иловаҳо ба Кодекси мурофиавии граждании Ҷумҳурии Тоҷикистон”, “Дар бораи ворид намудани тағйиру илова ба Кодекси ҷиноятии Ҷумҳурии Тоҷикистон” ва “Дар бораи ворид намудани тағйир ба Кодекси андози Ҷумҳурии Тоҷикистон”-ро муҳокима кардаанд:
“Аз ҷониби аъзои Шӯрои Маҷлиси миллӣ масъалаҳо оид ба ворид намудани тағйиру иловаҳо ба як зумра кодексу қонунҳои Ҷумҳурии Тоҷикистон бо мақсади такмилу мукаммалгардонӣ ва мутобиқсозии онҳо ба санадҳои меъёрии ҳуқуқии дар Ҷумҳурии Тоҷикистон амалкунанда мавриди баррасии ҳамаҷониба қарор гирифта, онҳо ҷиҳати баррасӣ ба рӯзномаи иҷлосияи дуюми Маҷлиси миллии Маҷлиси Олии Ҷумҳурии Тоҷикистон даъвати шашум, ки 26-уми июни соли 2020 баргузор мегардад, пешниҳод гардиданд”, — хабар дод манбаъ.
Ҳамчунин, тибқи рӯзномаи ҷаласа, аъзои Шӯрои Маҷлиси миллӣ лоиҳаи қарорҳои Маҷлиси миллии Маҷлиси Олии Ҷумҳурии Тоҷикистон дар бораи бозхонд ва интихоб намудани судяҳои Суди Олии Ҷумҳурии Тоҷикистон, интихоби машваратчиёни халқии Суди Олии Ҷумҳурии Тоҷикистон барои солҳои 2020-2025 ва интихоби намояндаи Маҷлиси миллии Маҷлиси Олии Ҷумҳурии Тоҷикистон дар Суди конститутсионии Ҷумҳурии Тоҷикистонро бо тартиби муқарраргардида баррасӣ кардаанд.
Дар Шӯрои Маҷлиси миллӣ қарорҳои дахлдор “Оид ба лоиҳаи Қарори Маҷлиси миллии Маҷлиси Олии Ҷумҳурии Тоҷикистон “Дар бораи Нақшаи амали Маҷлиси миллӣ барои солҳои 2020-2025 дар партави муроҷиат ва роҳнамоиҳои Президенти Ҷумҳурии Тоҷикистон дар иҷлосияи якуми Маҷлиси миллии Маҷлиси Олии Ҷумҳурии Тоҷикистон даъвати шашум аз 17 апрели соли 2020”, “Дар бораи лоиҳаи Қарори Маҷлиси миллии Маҷлиси Олии Ҷумҳурии Тоҷикистон “Оид ба тасдиқи Низомнома дар бораи шаҳодатнома ва нишони сарисинагии узви Маҷлиси миллии Маҷлиси Олии Ҷумҳурии Тоҷикистон, намуна ва тавсифи онҳо”, “Оид ба тасдиқи Низомнома дар бораи шаҳодатномаи раис, муовинон ва судяҳои Суди Олӣ ва Суди Олии иқтисодии Ҷумҳурии Тоҷикистон, намуна ва тавсифи он” ва “Оид ба тасдиқи Низомнома дар бораи шаҳодатномаи хизматии хизматчиёни давлатӣ ва граждании Дастгоҳи Маҷлиси миллии Маҷлиси Олии Ҷумҳурии Тоҷикистон, намуна ва тавсифи он” қабул гардидааст.
Ёдрас мекунем, ки иҷлосияи дуюми Маҷлиси миллии Маҷлиси Олии Ҷумҳурии Тоҷикистон даъвати шашум имрӯз, 26 июн, баргузор мегардад.
