Татбиқи ташаббуси «Муҷаҳҳазгардонӣ ва рушди Маркази ҷумҳуриявии илмии саратоншиносии шаҳри Душанбе», ки аз ҷониби ширкати австриягии AME International моҳи майи соли 2024 дар доираи Форуми ҳамкорӣ байни Австрия ва Ҷумҳурии Тоҷикистон пешниҳод гардида буд, ба шарофати фаъолияти ҳамоҳангшудаи мақомоти давлатӣ ва дастгирии ҳамаҷонибаи роҳбарияти Мақомоти иҷроияи ҳокимияти давлатии шаҳри Душанбе, таҳти роҳбарии муҳтарам Рустами Эмомалӣ имконпазир гардид.
Вазорати тандурустии Ҷумҳурии Тоҷикистон қисмати тиббии лоиҳаро бо истифода аз технологияҳои муосир бо сифати баланд таҳия намуд, ҳамзамон Вазорати молия шартҳои қарзи имтиёзноки австриягиро ба таври самаранок мувофиқа кард.
Австрия ва Тоҷикистон оид ба маблағгузории имтиёзноки лоиҳа созишнома ба имзо расониданд. Марҳилаи якум, ки барои солҳои 2026–2027 пешбинӣ шудааст, таҷдиди техникии марказро дар бар мегирад, аз ҷумла насби суръатбахши хаттӣ, СПЕКТ-КТ, инчунин рушди самтҳои тибби ҳастаӣ, ташхис ва табобати радиатсионӣ.
Ҳаҷми умумии лоиҳа 10 миллион Евроро ташкил медиҳад.
Тибқи баҳогузориҳо, дар сурати бозгашти ҳатто 20–30 фоизи беморон, ки қаблан барои табобат ба хориҷ сафар мекарданд, лоиҳа метавонад аллакай дар давраи имтиёзноки қарз ба худмаблағгузорӣ ноил гардад, ки онро аз ҷиҳати иқтисодӣ судманд мегардонад.
Лоиҳа дар самти баланд бардоштани сифати хизматрасонии саратонӣ дар кишвар мусоидати муассир ва дарозмуддат намуда, ҳамзамон ба рушди инфрасохтори муосири тиббӣ ва таҳкими имкониятҳои ташхису табобат саҳми назаррас хоҳад гузошт.
Таҳлилҳои ИмрӯзNews:
AME International GmbH — яке аз ширкатҳои пешсафи байналмилалӣ дар самти таҳия ва татбиқи қарорҳои технологӣ дар соҳаи тандурустӣ буда, аз соли 1995 дар татбиқи лоиҳаҳои бузурги инфрасохтории байналмилалӣ таҷрибаи ғанӣ дорад.
Ширкат зиёда аз 100 лоиҳаро дар Аврупо, Осиё, Африқо, Амрикои Марказӣ ва Шарқи Наздик амалӣ намуда, ба беш аз 200 беморхона бо 56 000 ҷойи хоб кӯмак расонидааст. Ба шарофати ин, AME дастрасӣ ба хизматрасониҳои тиббиро барои зиёда аз 165 миллион нафар дар саросари ҷаҳон беҳтар намудааст.
Самтҳои асосии фаъолияти AME пешниҳоди хизматрасонӣ ба беморхонаҳои сатҳи дуюм ва сеюми кӯмаки тиббӣ дар соҳаҳои саратоншиносӣ, табобати радиатсионӣ, ҳифзи саломатии модар ва кӯдак, бемориҳои дил ва рагҳои хунгард ва муассисаҳои табобатии умумисоҳавиро дар бар мегирад.
AME International GmbH
Hietzinger Hauptstraße 46
1130 Wien
Австрия
Акс: Вазорати молияи Ҷумҳурии Тоҷикистон
