Рӯзи 28-уми ноябр дар меҳмонхонаи «Ҳаят Реҷенсӣ» ҷаласаи Комиссияи байниидоравӣ оид ба муқовимат ба савдои одамон дар мавзӯи «Муаррифии Роҳнамо оид ба ҷамъоварии маълумот ва омода намудани гузориши солона дар самти муқовимат ба савдои одамон дар Ҷумҳурии Тоҷикистон» баргузор гардид, иттилоъ додааст маркази матбуоти ВКД-и Ҷумҳурии Тоҷикистон.
Дар ҷаласа Раиси Комиссияи байниидоравӣ оид ба муқовимат ба савдои одамон, муовини якуми Вазири корҳои дохилӣ генерал-полковники милитсия Абдураҳмон Аламшозода, директори шуъбаи байналмилалии мубориза бар зидди маводи нашъаовар ва ҳифзи тартиботи ҳуқуқӣ (INL) дар Ҷумҳурии Тоҷикистон Гиллеспи Брайан, намояндаи Созмони Байналмилалии Муҳоҷират дар Тоҷикистон Баҳром Раҳматҷонов ва дигар кормандони сохторҳои ҳифзи ҳуқуқ, ташкилоту идораҳои давлатӣ иштирок ва суханронӣ намуданд.
Чорабиниро бо сухани муқаддимавӣ Раиси Комиссияи байниидоравӣ оид ба муқовимат ба савдои одамон, муовини якуми Вазири корҳои дохилӣ генерал-полковники милитсия Абдураҳмон Аламшозода оғоз намуда, изҳор дошт, ки ҳадаф ва мақсади комиссияи мазкур мубориза бо хариду фурӯши одамон аз он иборат аст, ки дар ҳамбастагӣ мову шумо фаъолиятро дуруст ба роҳ монда, сатҳи ҷинояткорӣ ва ҳама он омилҳои ба ин раванди мубориза монеагӣ кунандаро бартараф созем ва нуфузу эътибори давлатро баланд бардорем. Ҳамчунин мавсуф дар идомаи суханронии худ қайд намуд, ки мо дар соли сипаришуда шумораи зиёди конференсия ва мизҳои мудаввар, инчунин курсҳои такмили ихтисосро дар соҳаи прокуратура, мақомоти судӣ ва мақомоти корҳои дохилӣ минтақа ба минтақа доир намудем. Дар соли равон бошад, то ба имрӯз дар ин самт семинарҳои омӯзишӣ дар шаҳри Душанбе, марказҳои маъмурии вилоятҳои Суғду Хатлон, Мухтори Кӯҳистони Бадахшон, ноҳияҳои тобеи марказ ва водии Рашт баргузор карда шуд.
Дар ҷаласаи мазкур иштирокчиён дар мавзуъҳои «Аҳамияти ҷамъоварӣ, коркард ва таҳлили маълумот ҳамчун воситаи калидӣ барои муқовимат ба савдои одамон дар заминаи байналмилалӣ ва миллӣ», «Мушаххасот ва талаботи асосӣ барои пешниҳоди маълумот дар ҳисоботҳои байналмилалӣ оид ба муқовимат ба савдои одамон бо дарназардошти таъмини муқоисашавандагии маълумот» ва муаррифии «Дастурамал доир ба ҷамъоварии маълумот дар соҳаи муқовимат ба савдои одамон дар Ҷумҳурии Тоҷикистон» баромад намуданд.
Дар охири ҷаласа барои беҳтар гардидани фаъолияти комиссияи мазкур ва ба пешравиҳо ноил гардидан дар самти муқовимат ба савдои одамон аз ҷониби иштирокчиёни ин чорабинӣ таклифу пешниҳодҳои судманд ироа гардид.
Тоҷиддин Латипов
